Get it on Google PlayDownload on the App Store
EN

yuenyee

1年前.收藏在 蒲在深水 Sham Shui Po

[花生食記] 深水埗地踎健康食店

[花生食記] 深水埗地踎健康食店

我同某位都係住係深水埗嘅女性朋友食飯,永遠必食一樣嘢 — 淮山羹。事緣呢位朋友都係識食之人,做飲食相關行業多年,食盡天下好食,要食餐好嘅從來我都由佢發板。係唔大飲大食嘅日子,朋友會食得健康。某次街坊平時食飯,佢問我,有冇食過淮山根。淮山,細細個阿媽煲湯時已經食,衫板一塊冇乜味。到近年某啲餐廳會炒新鮮淮山,都叫食過下。但今次食嘅淮山羹,真係一食愛上。廚師用新鮮嘅靚淮山煲到好似粥一樣,配肉丸或者鯪魚球稍稍調味,好食過粥舖嘅粥之餘,仲要唔會好似粥咁升糖快(low GI),更少糖份,而且有健脾益胃等等療效。新鮮淮山處理比較麻煩,去皮嘅時候會令皮膚敏感。難得有食店不厭其煩咁烹調呢個菜式仲要唔加味精,都只係賣三十零蚊,點可能會走寶呢?所以自此朋友約我街坊食飯,我哋都會一人隊一碗淮山羹。即使係有跟飯,隊完已經好夠飽,食唔落。

除咗必食嘅淮山根之外,呢間豆膶咁細嘅小店仲有好多好食嘅嘢食。今次叫咗嘅係蒸瓜子斑,係新鮮買番嚟嘅海斑嚟,即叫即蒸冇蒸老啲肉滑捋捋,魚仔細細兩個人剛剛好。價錢稍為貴少少七十幾蚊,一分錢一分貨啦。

呢度蠔餅春卷都好好食,有機會再介紹。

肉丸淮山根 + 蒸瓜子斑

淮山根健康又飽肚 瓜子斑非常新鮮非常滑